اهلين❤
ترددت كثير قبل ما اكتب هالتدوينة ولذلك انا اكتبها بوقت متأخر لأني فعلا مو متأكدة وش مفروض اكتب..
بس اتمنى انها تعجبكم..
سنة ٢٠١٩ كانت سنة غريبة علي مرة بعد مرور سنة ٢٠١٨ الي فعليًا اقدر اطلق عليها سنة الخسارات والحمدلله،
ب٢٠١٩ خسرت أهم واحزن شيئين لروحي للاسف وبصلي لله كثير انها تكون بدايات احسن مو خسارات!
سبحان الله فعلا على قد ما يكره الانسان انه يخسر الا انه ممكن يصنع من هالخساره بداية جديدة،
هالسنة فعلا صنعت فيني اشياء كثيرة وبدايات كثيرة وتغييرات اكثر..
ايش سويت لنفسي هالسنة؟
عرفت نفسي اكثر ووعيت لنفسي كلمتها ناقشتها عرفت مشاكلي سواء تجاه ذاتي او لحياتي..
تعلمت كثير كيف احل مشاكلي تجاه نفسي والاهم كيف اعترف بمشاكلي واخطائي وبكل شيء اهرب منه..
يمكن تأجيلي للدراسة هالسنة على قد ما كان قاسي علي الا اني تعلمت اقرب من نفسي اكثر لأن مرات فعلا من كثر ما اركز بالدراسة وكل محور حياتي هالدراسة انسى نفسي وانسى اقعد معاها!
بديت فعلا اشتغل على نفسي من كثير نواحي وحققت كثير اشياء اسوفها من سنين..
كيف اشتغلت على نفسي؟
حققت اهم واكبر هدف بحياتي وكنت فعلا اتمنى اطبقه من زمان الي هو الرياضة، بهالسنة من شهر July تقريبًا بديت امارس الرياضة بشكل يومي وبديت اغير نمط حياتي لنمط صحي والأهم ان بديت اتعلم واتثقف بشكل كبير مرة عن الصحة والرياضة وتفاصيل دقيقة عن التمرين..
جدًا فخورة باللي سويته وانجزته تجاه نفسي
خطوة الرياضة صنعت مني شخص ثاني تمامًا،
اعطاني هدف وشغف عشان اقوم عشانه كل يوم!
هدف اصنعه تجاه نفسي، كنت اسمع كثير يقولون عن الرياضة اشياء كثير واستغرب مرة وما استشعرت الموضوع الا لما جربت فعلا..
إن شاء الله لما استمر اكثر واتثقف اكثر ويصير الوقت المناسب اني اقدر اتكلم عن الموضوع بسوي تدوينة كاملة مفصلة عن الرياضة ونمط الحياة الصحي..
ثاني خطوة اني رجعت لشيء فعلا احبه ويشبهني، رجعت له لأني فعلا كنت فاقدته الي هو التدوين، يا الله قد ايش التدوين والانستغرام والتشجيع الي كان يجيني كان فعلا اضافة مهمة بحياتي..
بس للاسف كنت احط لنفسي شروط وقيود كثيرة للتدوين وكنت مقيدة نفسي الى ما وصلت لمرحلة ان ماعاد اقدر ادون وبعدها دخلت الجامعة وانشغلت اكثر وتسويف على تسويف الى ما وصلت سنين من الانقطاع!
انا جدًا سعيدة وفخورة اني رجعت، صحيح للآن اعتبر التصوير خطوة صعبة شوي علي لكن لازلت احاول والحمدلله لازلت اتطور واتعلم
ثالث شيء الانستقرام، الرجعة للانستقرام وبستايل مختلف تماما كان من احلى الاشياء الي سويتها تجاه نفسي، ندمانة فعلا اني قطعت رغم ان كان يجيني متابعين بشكل مستمر ووصلت رقم كويس بوقت قصير، لكن الحدود الي دايم حاطتها لنفسي كانت هي العائق لي!
والقراءة من الاشياء الجميلة جدًا بحياتي والي رجعت لها ب٢٠١٩، صحيح اني بديت بروايات ومقصرة بالكتب الي ممكن تفيدني فعلا لكن معتبرتها تمرين قبل لا ابدأ بالمفيد فعلًا..
وش تركت ب٢٠١٩؟
تركت التسويف او اتمنى اني فعلا قدرت اتركه!
طوال حياتي التسويف عائق واقرب لجدار كبير يعيق حياتي، ولا مرة فكرت ان فعلًا التسويف هو العائق!
عشان كذا قررت ان ٢٠٢٠ هي نهاية التسويف خلاص اي فكرة بمخي عاجبتني وابي أطبقها بطبقها ومارح اجلها..
تركت القسوة على نفسي! لأني اؤمن ان كلنا نستاهل الحنية مع انفسنا وذواتنا وأرواحنا، نستاهل نساعد نفسنا ونساعدها..
واهم شيء تركت عدم الايمان بنفسي وقدراتي!
وش باخذ معي ل٢٠٢٠؟
باخذ معي الي بديته من تدوين وانستقرام وقراءة ورياضة، باخذ قوتي وعدم انهزامي
والاهم باخذ قدرتي على عدم خسارة ذاتي لان شخصيا بالنسبة لي اشوف ان اهم شيء الانسان يسويه تجاه نفسه انه ما يخسرها ابدًا مهما صار ومهما قست عليه الحياه واخذت منه..
اهدافي..
صراحة الى الان مو متأكدة من كل اهدافي وللآن ما كتبتها وماعرف لو هالشي يدخل تحت مشكلة التسويف!
لكن انا من الناس الي اؤمن اني ماقول كل اهدافي بصوت عالي لاسباب في نفسي، عالاقل لبداية هالسنة وانا مؤمنة بهالشيء وممكن يتغير!
لكن اكثر هدفين قدامي حاليا اني اشتغل على جسمي اكثر،
اقرأ واكتب اكثر،
طبعا اطور لغتي قد ما اقدر،
عاد باقي الأهداف خلوها لنهاية السنة ان شاء الله واشارككم الأهداف وايش حققت منها،
ختامًا، اتمنى من كل شخص يخلي كل بداية سنة هي بداية جديدة له، بداية جديدة لكل شي حلو
بداية نشتغل ونتعلم فيها أكثر، كل يوم جديد هو بداية جديدة وفرصة جديدة اننا نكون احسن من امس..
اخترت عنوان التدوينة من افتباس اعجبني
"الحياة جدًا قصيرة لقضائها في محاربة نفسك"
دائمًا اعطوا انفسكم الكثير وحبوها وادعموها بالشيء الي يفيدكم ويطوركم ويضيف لكم
..
شكرًا لكم واتمنى تكون التدوينة وصلت لقلوبكم
انستقرام: Billionbym "اضغطوا عالاسم عشان تروحون للصفحة"
ايميل: Billionbym@gmail.com
