السلام عليكم ورحمة الله وبركاته،
كيفكم؟ إن شاء الله كلكم بخير♥♥..
الصدق صرت استحي إني اعتذر لأن شكلي في كل بوست رح اعتذر،
فيه أفكار كثيرة مرة بس التصوير وتعديل الصور والكتابة تاخذ مني وقت،
لذلك أبغاكم تعذروني لغاية الصيف إن شاء الله وقتها بإذن الله رح أنزل بوستات كثير وأعوض التقصير اللي الحين،
بوست اليوم إن شاء بيكون عن طريقتي في وضع الكونسيلر وهي تقريباً الطريقة الأفضل،
وأكيد مو كل شيء ناسبني مفروض يناسبك والعكس صحيح،
طيب..
هذي الأدوات اللي رح استخدمها،
أول شيء لازم تعرفين إن الهالات لونها في الأساس أزرق مو أسود،
وجربي تفردين الجزء اللي تحت عينك بتشوفين إن فعلاَ لونها أزرق،
طيب ليش مرات لما نحط الكونسيلر على الهالات تقلب رمادي أو تبقى كأنك ما حطيتي شيء؟
لأن ما ينفع نحط على الأزرق لون بيج على طول، طيب إيش الحل؟
على دائرة الألوان اللون المكمل للأزرق هو البرتقالي تحطي لون برتقالي على أزرق اللي هو لون الهالات وبعدها تحطين الكونسيلر اللي هو نفس لون بشرتك أو جاي على برتقالي لا تحطين فاتح خاصة لو عندك عيوب بارزة زي الهالات القوية أو الخطوط من الجفاف أو كبر السن؛
أنا هنا اعتبرت إن هذي هالات ورح أوريكم كيف أخفيها،
أكيد ما بتكون زي العين لكن أنا حبيت أوضح الطريقة بس؛
هنا حطيت عليها أول شيء كركتر اللي هو مصحح لون ولونه برتقالي بس هذا جاي غامق،
إذا عندك خطوط أو إنتي كبيرة في السن حطي مرطب قبل،
والمصحح والمرطب يفضل تحطيها بإصبع الخاتم اللي جمب الوسطاني بطريقة الطبطبة لأنه تحت العين منطقة حساسة ولازم تعاملينها بخفة كثرة الفك أو القساوة ترهل المنطقة و تطلع الخطوط من بدري؛
استخدمت هذا المصحح من NYX جاي لونه غامق مره على الرغم من إن هالات متوسطة ما حبيته كثير،
جربت روج كريمي من باليت أرواج لونه برتقالي فاتح ولونه واضح وجاب نتيجة أحلا،
سعرة 35 من سنتر بوينت.
هنا حطيت كونسيلر مبين لونه أغمق بس هو لونه على بشرتي بس جاي برتقالي خفيف وحلو،
بس ما بكتفي فيه لو أبغى تغطية كاملة لمناسبة.
أستخدمت هذا النوع من غارنييه وتكلمت عنه في التدوينة السابقة،
حطيت بشكل كافي للهالات،
و وزعته بهذي الفرشة من ريل تكنيك،
وسويت طبطبة خفيفة بإصبع الخاتم من غير دمج كامل لأني لسة ما خلصت؛
هنا حطيتت الإضاءة أو كونسيلر أفتح مني بكم بدرجتين أو ثلاثة؛
واستخدمت هنا الكونسيلر من ميبيلين جداً رائع كمان تكلمت عنه في التدوينة السابقة،
تحت العين أحطه بطريقة مثلثه زي ما يناسبني ويريحني مو شرط تحطينه بشكل مثلث حطيه بالطريقة اللي تناسبك؛
وبحبيبتي هذي الاسنفجة من ريل تكنيك مستحيل استغني عنها فضيعة،
غرقتها مويه وعصرتها بحيث تكون مبلله بشكل يسهل علي الدمج،
ودمجت الكونسيلر بطريقة الطبطبة لما صار جزء من البشرة بطريقة مريحتني؛
وهنا آخر شيء بعد الدمج للأسف هنا الشكل طالع مو نظيف ومو من العادة،
النتيجة تحت العين تصير أحلا من كذا بكثير.
وآخر خطوة الباودر للتثبيت غالباً يفضل تحت العين البودرة الحرة لأنها تقلل من احتمالية تكتل البودرة وبالتالي يخطط ويعطي شكل سيء،
أنا هنا حطيت بودرة بنانا من بن ناي لونها أصفر قوي بس تعطي نظافة ونظارة بس للأسف ما صورتها،
ولاحظي إنها ما تناسب أي لون يعني أحسها ما تنفع للسمر مرة ولا البيض مرة،
تقدرين تحطين البيضاء اللي بدون لون لكن لو تعترفين إنك رح تتصورين صور بفلاش إبعدي عن الـHD،
لأنها تبين تحت الفلاش ومخصصة لتصوير الـHD فقط،
عندك بودرة بيضاء بدون لون من بن ناي مو HD كميتها كبيرة وسعرها مناسب وتناسب كل ألوان البشرات؛
نجي لكيف أحطها؟
أخذها بالاسفنجة المببلولة واحط كمية تحت عيني لفترة بدون ما أوزعها وأسوي أي شيء ثاني في وجهي وعلى قد ما أبغى لونها الأصفر يبين على قد ما خليها بدون توزيع بعدين أخذ فرشة الستبلنق وكمان للأسف ما صورتها بس موجودة في أول صورة، أو أي فرشة تكون فلافي شعرها مو مرة كثير،
وأبعد الزايد من تحت عيني.
وبكذا أكون خلصت كل شيء وحصلت على إطلالة تحت عيني نضرة وحلوة وخالية من العيوب والهالات.
وبس.
*وأعتذر لو كان فيه أي تقصير.
*إذا حابين أسوي مراجعة لأي منتج بالتفصيل أكتبولي تحت في التعليقات.
*لو أعجبتك التدوينة صدقيني تعليق مرة بسيط بأي كلمة أو تنشريها في أي مكان يأثر كثير♥♥♥.
وشششكككرراً♥♥♥.
قريت تدويناتك كاملة ! مرررة مرررة جميلة <3 استمري <3
ReplyDeleteسعدت جداً بزيارتك، ورح اكون اسعد لو اشتركتي، شكراً لك♥♥
Delete